English version 

Saga svæðisins

- Saga Hótels Hellna

Nágrenni Snæfellsjökuls hefur alltaf verið sveipað dulmagni allt frá því Bárður Snæfellsás settist hér að fyrstur manna. Bárður fæddist í norðurhluta Noregs, átti samíska móður sem var sjaman, og var alinn upp meðal dverga í Dofrafjöllum í Noregi þar sem hann lærði galdra og forneskju.

Bárður laðaðist að þessu snævi þakta fjalli sem hann kallaði Snjófell. Síðar breyttist nafnið í Snæfell og enn síðar í Snæfellsjökul, þegar jökulheitinu var bætt aftan við það. Jökullinn sjálfur er 1.446 m hár og undir hinni formfögru snjóbreiðu er virkt eldfjall.

Bárður settist að á Laugarbrekku á Hellnum (Forna-Laugarbrekka sem hægt er að ganga að frá Hótel Hellnum eða aka/ganga að frá Útnesvegi 574) en á meðan hann byggði bæ sinn bjó hann í Sönghelli. Síðar notaði hann hellinn fyrir seremóníur með mönnum sínum. Bárður lifði litskrúðugu lífi en þegar hann vildi ekki lengur búa meðal manna gaf hann allar eigur sínar og gekk “inn í” Jökulinn. Í framhaldi af því varð hann í hugum fólks að anda Jökulsins og verndari þeirra sem ákölluðu hann.

Á Laugarbrekku fæddist Guðríður Þorbjarnardóttir skömmu fyrir árið 1000. Sem ung kona fluttist hún til Grænlands með foreldrum sínum. Hún giftist Þorsteini syni Eiríks rauða en hann lést úr plágu. Síðar giftist hún Þorfinni Karlsefni og fór með honum til Vínlands. Þar ól hún soninn Snorra sem er talinn vera fyrsta barnið af evrópskum uppruna til að fæðast í Ameríku.

Á utanverðu Snæfellsnesi voru helstu ver landsins og fólk sótti þangað á vorvertíðir af öllu landinu, enda miðin kringum Snæfellsnes gjöful og stutt að sækja sjóinn. Víða má finna tóftir sem sýna dvalarstaði vermanna eða íverustaði tómthúsafólks svo sem á Hellnum, við Lóndranga, í Dritvík, í Bervík og við Gufuskála.

Þekkt skáld hafa búið á utanverðu Snæfellsnesi og má þar nefna Kolbein Jöklaskáld, Guðmund Stapakryppling, Sigurð Breiðfjörð og Steingrím Thorsteinsson. Síðari tíma skáld og listamenn eins og Halldór Kiljan Laxnes, Gunnar Dal, Þórður Halldórsson frá Dagverðará og Jóhannes Kjarval, auk margra annarra hafa sótt andagift sína í orku Jökulsins.

Náttúrufegurð er mikil á Snæfellsnesi og má segja að þar sé að finna allt það helsta sem prýðir Ísland á afmörkuðu svæði. Helsta varpsvæði sjávararnar er við Snæfellsnes, oft má sjá refi á Snæfellsnesi og fuglalíf er með eindæmum fjölbreytt. Í friðlandinu í Búðahrauni er að finna milli 130-150 mismunandi plöntutegundir sem dafna þar í skjóli hraunbollanna.

Saga Hótels Hellna:

Árið 1991 keypti hópur fólks í félagi sem heitir Snæfellsás ehf. jörðina Brekkubæ. Tilgangur þeirra var að eiga land undir Mannræktarmót sem félagið hélt árlega fyrstu helgina í ágúst. Jafnframt dreymdi þau um að koma þar á fót andlegri miðstöð.

Árið 1995 fluttu hjónin Guðrún og Guðlaugur Bergmann, ásamt yngri syni sínum Guðlaugi að Brekkubæ. Þau vildu gera tilraun til að láta draum hópsins rætast. Í fyrstu byggðist starfsemin á nokkrum námskeiðum ár hvert auk Mannræktarmótsins. Haustið 1996 tóku sjö úr eigandafélagi jarðarinnar sig saman og ákváðu að byggja sér þar hús. Til að hafa þau vist- og umhverfisvæn leituðu þau ráða í Findhorn í Skotlandi, sem er elsta sjálfbæra samfélagið í heiminum. Fóru þau þangað til vikudvalar í október 1996 og komu heim með upplýsingar sem þau fóru með til SG Húsa á Selfossi sem síðan hönnuðu og byggðu fyrir þau fjögur heilsárs timburhús.

Ljóst var að erfitt yrði að skapa sjö manns atvinnu með rekstri nokkurra námskeiða á ári. Hins vegar var vaxandi eftirspurn eftir gistingu á Brekkubæ og fór svo að hópurinn ákvað að hefja gistirekstur árið 1997. Var strax gengið til liðs við Ferðaþjónustu bænda, enda Brekkubær lögbýli. Árið 1998 byggðu SG Hús fjögurra herbergja stakt hús fyrir gistireksturinn. Árið 2000 byggðu þeir sex herbergja viðbyggingu við gamla íbúðarhúsið sem er tengt því með móttöku og setustofu. Gamla íbúðarhúsið var síðan klætt að utan, gluggum breytt og þak hækkað til að það yrði í samræmi við nýbygginguna. Í mars sama ár var stofnað hlutafélag um rekstur gististaðarins sem fékk nafnið Gistiheimilið Brekkubær. Um leið var gengið til liðs við Green Globe 21, samtök sem votta sjálfbæra ferðaþjónustu um allan heim. Haustið 2000 hlaut Gistiheimilið Brekkubær svo umhverfisverðlaun Ferðamálaráðs Íslands.

Vorið 2004 var ákveðið að stækka enn og var byggð við ný álma með tíu 2ja manna herbergjum, setustofu og línherbergi. Við stækkunina var gististaðurinn skilgreindur samkvæmt byggingareglugerðum sem hótel og nafninu því breytt í Hótel Hellnar. Enn var leitað til SG Húsa sem sáu um alla framkvæmd. Valið var umhverfisvænt byggingarefni nú sem fyrr og lögð áhersla á orkusparandi þætti.

Í apríl 2010 seldi Guðrún G. Bergmann Hótel Hellnar til Hringhótels ehf., sem hafa tekið við öllum rekstri þar.