English version 

Stefna okkar er:
“Að vera til fyrirmyndar í sjálfbærri ferðaþjónustu.”

Hotel Hellnar - Umhverfisstefna

Hótel Hellnar hafa skuldbundið sig til að veita gæðaþjónustu í öruggu, umhverfisvænu umhverfi þar sem lögð er áhersla á að nota náttúruvæn byggingarefni og fylgja stöðlum um umhverfisvænar byggingar. Við hvetjum gesti okkar til að taka þátt í átaki okkar til að vernda umhverfið með því að veita þeim upplýsingar um starfsemi okkar og benda þeim á hvernig þeir geta stutt við umhverfisstefnu okkar. Við höfum verið vottuð af alþjóðlegu umhverfisvottunarsamtökunum Green Globe 21 frá árinu 2002. Starfsemi okkar er árlega tekin út og endurvottuð. Ásetningur okkar um stöðugar endurbætur í umhverfismálum staðfestir skuldbindingu okkar gagnvart umhverfinu og tryggir jafnframt viðskiptavininum að við séum að starfa í samræmi við stefnu okkar.

Skuldbinding okkar er að:

• Ná fram traustri umhverfisstjórnun í öllum þáttum starfseminnar.
• Fylgja að fullu eftir öllum lögum og reglum um umhverfismál.
• Draga úr mengun og úrgangi með því að endurnýta, endurvinna, spara orku og vatn og nota umhverfisvottaðar vörur.
• Gera árlegar úrbætur á öllum helstu þáttum rekstursins sem snúa að stöðlum GREEN GLOBE 21.
• Tryggja, þar sem því verður við komið, að allar vörur og efni sem notuð eru á hótelinu séu af náttúrulegum uppruna, séu umhverfismerktar eða með upprunavottorð, þannig að áhrif af notkun þeirra séu engin eða í algjöru lágmarki.
• Nota öll tækifæri sem gefast til að vinna með öðrum í ferðaþjónustu, félagasamtökum, sveitastjórnum eða ríkisstjórnum og almenningi í samfélagi okkar að því að efla meðvitund um umhverfið.
• Veita öllum starfsmönnum þá þjálfum og þekkingu sem þarf til að ná markmiðum okkar.
• Leita stöðugt að frekari þekkingu um sjálfbæra þróun almennt og flytja þá þekkingu áfram til starfsmanna, gesta og annarra.
• Ræða opinskátt um stefnu okkar og umhverfisstjórnun við gesti og aðra áhugasama aðila.
• Nota vörur framleiddar á svæðinu sem við búum á þar sem því verður við komið.
• Ráða einstaklinga frá okkar svæði til starfa eða einstaklinga sem koma frá svæðum þar sem ríkir atvinnuleysi.
• Endurmeta stöðugt alla þætti rekstursins til að tryggja að bestri frammistöðu sé ávallt náð í öllum þáttum hans.
• Taka Umhverfisstefnuna til árlegrar endurskoðunar.
• Draga úr hættu á neyðartilvikum með því að stunda reglubundið viðhald á eignum og með því að æfa viðbrögð við neyðartilvikum, komi þau upp.

Upprunalega gerð í mars 2000
Síðast endurskoðuð í júlí 2008
- Guðrún G. Bergmann

Umhverfisstjórnunarstefnu okkar framfylgjum við meðal annars með því að velja timbur til bygginga úr skógum sem eru endurplantaðir, nota umhverfisvæn byggingarefni innandyra, umhverfisvæna málningu, olíu í stað lakkefna (lakkefni erta slímhúð í öndunarfærum), náttúruleg efni í gólfdúkum, spara orku á ýmsan máta, nota umhverfismerkt hreinsi- og þvottaefni og trefjaklúta til þrifa. Sápa og sturtusápa í herbergjum er umhverfismerkt. Salernispappír er úr endurunnum pappír. Einnig vinnum við markvisst að orkusparnaði og endurnýtingu, auk þess að vera með græna innkaupastefnu.

Green Globe 21

Green Globe 21 eru samtök sem votta ferðaþjónustufyrirtæki um allan heim sem stunda sjálfbæran rekstur. Hugmynd að stofnun samtakanna kviknaði í kjölfar Ríó ráðstefnunnar 1992 þar sem skrifað var undir Dagskrá 21 en Staðardagskrá 21 er byggð á 28. kafla hennar. Green Globe 21 var síðan stofnað með stuðningi Alþjóðaferðamálaráðsins og Alþjóðaferðamálasamtakanna árið 1994. Á undanförnum árum hefur orðið mikil þróun innan Green Globe 21 og hafa samtökin nú staðla til að geta vottað tæplega þrjátíu mismunandi greinar ferðaþjónustunnar, auk þess sem þau votta samfélög og einstaka áfangastaði ferðamanna. Green Globe 21 eru einu vottunarsamtökin í heiminum sem votta samfélög.

Green Globe 21 er sjálfseignarstofnun sem er í samstarfi við tæplega tuttugu háskóla í Ástralíu þar sem starfa yfir 200 aðilar sem gera ekkert annað en rannsaka ferðaþjónustu og sjálfbæra þróun hennar. Hafa þessir rannsóknarmenn lagt grunninn að stöðlumGreen Globe 21 sem eru byggðir á Staðardagskrá 21. Green Globe 21 nýtur alþjóðlegrar viðurkenningar og starfar nú í yfir 50 þjóðlöndum í öllum heimsálfum.

Þeir sem leita eftir vottun frá Green Globe 21 ganga í gegnum þríþætt ferli:

A – Aðild (Affiliate):
Green Globe 21 býður upp á félagsaðild sem veitir upplýsingar um sjálfbæra þróun og hjálpar fyrirtækjum að skilja hvernig viðmið og vottun Green Globe 21 virka og hvernig hægt er að ná þeirri stöðu.

B – Viðmið (Benchmarked):
Næsta skref er að fyrirtæki hefji mælingar til að bera árangur sinn saman við viðmið Green Globe 21 óháð fullri vottun. Þau fyrirtæki sem hafa staðist þennan samanburð mega nota Green Globe 21 merkið án haksins til að auglýsa starfsemi sína með.

C – Vottun (Certified):
Fyrirtæki sem uppfylla allar þær kröfur sem fyrirtækjastaðlar Green Globe 21 gera og hafa hlotið vottun að undangenginni úttekt á staðnum, sem gerð er af viðurkenndum þriðja aðila, hafa fullt leyfi til að nota Green Globe 21 merkið með hakinu til að koma á framfæri árangri sínum í umhverfis- og samfélagsmálum.

Hólaskóli er umboðsaðili Green Globe 21á Íslandi. Aðilar innan skólans veita leiðbeiningar ef fyrirtæki hafa áhuga á að fara inn í vottunarferli Green Globe 21. Nánari upplýsingar er að finna á www.holar.is/greenglobe21 eða hjá Kjartani Bollasyni sérfræðingi í umhverfismálum sem starfar á Hólum.